ECIKS - Arkiva e Lajmeve

PRISHTINË – Pas reagimeve të disa ndërmarrjeve shoqërore në Kosovë dhe posaçërisht të Bashkësisë së Sindikatave të Pavarura të Kosovës lidhur me privatizim e ndërmarrjeve të para kosovare, përfaqësuesit e AKM-së dhe të USAID-it kanë përkrahur procesin e privatizimit dhe kanë pohuar edhe një herë se ndërmarrjet janë shitur aq sa është vlera e tyre reale në treg.

Lideri i USAID-it, Dale Pfeiffer, është shprehur për “Koha Ditore” se dyshimet e shfaqura për manipulimet e mundshme gjatë tenderimit janë të pabaza, ngase gjithçka ka shkuar sipas rregullave të shkruara. Pfeiffer ka ftuar kosovarët që me veprimet e tyre të mbështesin AKM-në në procesin e privatizimit.

Zëvendësmenaxheri i AKM-së, Ahmet Shala, ka deklaruar për të njëjtën gazetë se kundërshtimi i procesit të privatizimit është edhe kundërshtim i pavarësisë së saj. Në një intervistë të botuar në numrin e djeshëm, Shala ka mbrojtur shitjen e ndërmarrjeve të para me arsyetimin se në ekonominë e tregut vlerat caktohen nga ligjet e natyrshme e jo nga ministritë apo zyrat politike, siç ishte rasti në sistemin komunist. Shala është mjaft i sigurt se procesi i privatizimit nuk do të dështojë, ngase Kosova me Institucionet e saj dhe forcat vendimmarrëse është në gjendje të çojë këtë proces përpara drejt suksesit të plotë.

ECIKS (K.D.)